8件我坐小巴覺得討厭既事

25-9-2016

自從轉左工作到古洞之後，我每日就變成只搭小巴上下班，由屋企到元朗市，再由元朗入古洞，收工果陣就倒轉，一日總共要搭4架小巴
 

 
然後我就發現我坐小巴既時候，有八件事係令我覺得討厭




 8.有空位都唔停車
即係我明白小巴司機之間一定要合作先可以大家有飯，有時候前面有客而後面冇客，咁就會留番D客比後面果架上，古語有云：「有錢齊齊搵」，呢件事係直覺上合理，但對於一個做野做左十個鐘既人黎講，我都係想快D番到屋企休息下姐，你有位都唔比我上，咁我咪會攰，之後就燥，最慘係你呢架走左之後，條直路係一架車都冇，你既下一班我要等幾耐呀

7.成日坐滿先開車，好多時都冇車
呢個唔係講係我上左車之後，而係講我係路線既中間位等上車既時候，等左好耐都冇有位既小巴比我上，當然都係果句，人地做生意緊係滿左先算，但其實我會希望佢地可以間唔中有一兩架留一個位比路線中間既人上車，畢竟紅VAN作為公共交通之一，送市民到目的地係使命黎吧(當然係以乘客既角度啦)

6.等客搞到勁耐
繼續都係理性與感性既矛盾，上左小巴就係想佢快D開車，開快D，價錢又合理 (高過巴士低過的士)，但當唔夠客果陣效率時間之間既平衡就會打破，未開車既就等齊先開，開左車既就有咁慢開咁慢，期待多D人出黎搭車，當然人地做生意咁做緊係合理啦

5.未坐好就開車
有潮文都講，小巴係正常時間果陣係好有效率，你一上車佢就踩油，順勢你就到車尾坐，你要落車佢就剎車，你就因為力學問題成個人衝左去車頭，但呢種唔係人人都配合到，有時候一唔小心自己整到都算，有D時候可能會整到其他人，咁就可能有不快樂經驗

4.叫落車，司機唔比反應
常言道：搭小巴叫落車真係要好大勇氣，我都鼓起左勇氣大大聲咁叫落車，司機你唔舉一舉手比反應，我會以為你聽唔到嘛，你估你架車係靜音車廂呀，包你一定聽到架，咁你話我仲叫唔叫多次好呀，你原來聽到的話又要寸我，你原來聽唔到的話我又要自己行番轉頭

3.出面既人唔讓人坐入去
呢樣野真係好麻煩，架車好細、個位好窄、你又大舊、我又有背包，咁我點行入去呀，完全體現到「小巴又難過又快樂」既潮文之感，你唔讓開D既時候，我撞到你你又要發脾氣，妖！總之就係行為與目的相悖既人

2.車入面D人講野大聲，司機成日以為佢地係咪叫落車而分心
特別係內地同外地人，用自己D講到鬼死咁大聲，又要大聲講大聲笑，你噪住我訓覺都算，你係咁講野，個司機又要留意係咪有人叫落車或者係咪你地講唔正個目的地既名，咁個司機分左心，會發生咩事都可以想像到吧

1.同一個地方要落既時候，總有第二個人再叫多次
最後一樣係我唔知點解好好好好好討厭！有時唔明點解坐小巴有d人叫a地點有落之後，總會有人即刻大叫番同樣a地點有落，對佢有咩好處？最勁係今日係西鐵站附近，十五秒入面有四個人分開並連續咁叫西鐵站有落，你地對耳係咪裝屎架！

以上