5-4-2020
早一排我要幫公司續牌，拎住一大文件坐車過海，上到社署坐係度等左個官一陣間，之後好似鬼上身咁揮動鉛筆話「呢個文件漏左」，「呢度填錯左」，「呢度要搵你老細簽番名」。其實我已經唔係第一次交續牌文件，不過通常兩三年一次，所以我都係交左兩次only，雖然之前都唔係一次就成功，但我都覺得可以既，因為之前啲官都好好人，會好客氣咁同我講，加上番工時間遊車河我當然係ok啦。
今次就唔同啦，果個咀臉真係嚇我一跳，佢講出幾個令我「驚嘆」既「錯處」。
第一，佢問我點解填一份表格又用藍筆又用黑筆，話好核突唔會接受，又話自己教左我哋間院好耐。
問題一：香港有咩法例講話一份文件上係唔可以用多於一種顏色筆填寫呢？
以我所知好似只係建議人用黑色或藍色，自己都未識野仲話教？
第二，佢話點解填左既表格係影印本，就算係正本簽名簽係影印本上都唔得？
問題二：簽署最大既功用係確實以上資料，即使上述資料係手寫、影印或電腦列印出嚟，只要簽果個人簽署確實左，唔接受既合理原因何在？
第三，佢問點解同一張表上面有兩個人既字跡呢，咁證明唔係簽果個人填。
問題三：如上題所講，簽署者只確認上述資料如佢所知一致，香港法例有邊條講填表者一定要係簽名果個？如果有，請問係咪所有銀行幫客開信用卡果張卡；保險公司開保單果張表；電話公司簽果張約都要個客自己手寫先得？
問題四：如上述問題既答案均表示該牌官係冇法律基礎及合理原因下彈我並講出咁多降低世界智商平均值既說話，係咪可以係申訴專員公署就有關無理表達意見？
第四，最後佢話要問佢老細收唔收貨先。
問題五：老細只有出糧比員工果個人，如果佢職位高過你，佢只係你上司，咁請問香港社署職員既老細係邊個呀？
坐係佢面前既係其實一個，我代表緊果間有限公司都係其中一個。
另一方面唔理果個有問題人士，今年2020年，互聯網誕生幾十年啦，仲要人地拎一大堆文件搭車去指定地點遞交，仲要有可能比人彈回既原始做法，係咪令人懷疑社署拎左咁多民膏，佢班「it」係咪都只有屎食？而且食唔飽？
宜家報稅、整身份證、辦入境、續車牌等都可以用網上系統交（先唔講個系統本身都有大量問題），但宜家係續牌，即係本身署方已經有一定程度既公司資料之下，竟然冇得網上交表，竟然冇得用上傳檔案既方式將附件傳比有關部門，多麼高科技既政府部門！！！
多麼浪費眾人既時間同金錢成本。係香港抗疫期間，多麼能夠提升公司員工同社署職員染病既機會。呢個行業係多麼落後，真係全靠呢班用年資上位既社署公務員啊~
沒有留言:
張貼留言