英文仍然需要先學好

有好多人都話香港人崇洋, 但宜家係香港越黎越少人講英文係好. 理由我估:

1. 科技發達左, 以為好叻英文先可以係大學拎好成績畢業, 宜家上GOOGLE有翻譯, 上YAHOO!有字典, 再無必要記果D英文, 有咩唔識睇, 唔識講, 拎起手機一上網就OK.

2. 香港人眼見中國睇黎好似多好多商機, 大家都搶住去學普通話, 諗住咁樣埋堆可以分到上面一杯羹. 政府或多或少為左接合上面, 加推普通話既必修堂.

3. 宜家係香港工作既職位多左好多都係服務業, 或者其他多人做既工, 其實都唔需要用到英文, 係呢個又「無必要」又無機會訓練既情況下, 不如留番D時間去娛樂或者學普通話更好啦.

語言無分貴賤, 畢竟語言只係人類為左交流而發明出黎既系統, 即係話只要係表達到自我既意思而跟人作出一個交流就OK. 我本身認為中文好好, 一是母語, 二係詞彙多, 可以更具體仔細咁表達. 但係今時今日, 英文其實仲係一個最重要要花心機學既語言, 如果比我選擇, 我會花更多時間係英文多個普通話, 原因係:

1. 普通話相對易學, 只要夠膽講, 其實好多字自己係識既, 或者好似我咁自己一個去左台灣農村 兩個星期, 基本上我講國語同普通話, 人地會聽得明我講咩.

2. 中國雖然人多, 但唔係中國人既人更多, 佢地各有各語言, 但大部分通用都係英文, 而有D中國人亦會用英文, 所以講普遍性, 依舊都係英文勝. 而且要識普通話既, 中國已有十三億, 點解要搵香港人, 正正就係以為香港人既英文會好D嘛.

3. 呢D亦係最重要, 因為中文字每每都係圖畫變出黎, 變化多端. 相反, 英文字係串出黎, 係限定
既26個字母上更易整上電腦既KEYBROAD.

呢個正正就係睇唔出世界既趨勢, 不論係中國, 美國等等日後成為世界經濟大國, 電腦都係不可缺少, 識左電腦既語言可以比你更有機會發明新既程式賺大錢, 可以令你更有實力增加就業競爭力, 可以堵加生活效率及質素, 而所有電腦程式上既編碼都係用英文變出黎.

為左把握世界趨勢, 為左可以認識各國人士, 為左方便自己生活,學好英文仍然係呢個社會最基本要求.