Ingress 週記 001 - team JAR (28-9-2014)

28-9-2014

ingress, 一隻半AR既GOOGLE APP GAME, 用現實世界既地圖作遊戲世界既地圖.

我係8月20日正式開始玩, 玩左幾日之後, 拉多兩個人同我玩, 其中一個就係高登MR.A (後稱A), 經過兩星期既努力, 由LV1升到LV8, 即係遊戲入面所有ITEM都可以使用(現時最高等級為LV16), LV8再升的話, 再唔係只靠AP(經驗值), 同時亦都要有指定數目既章數.

係一次活動之下, 我地加入了JESSE, 成為了JAR既ingress team! 

第一次活動於青衣, 路線如下

 

我地先係青衣C出口開始出發, 經過左運動場, 游泳池之後就沿著河邊北上, 中途既Portal唔算多, 但冇黎過青衣玩ingress既我地可是一個UPV (Unit Portal Visit)既好時機!!





一直到東北公園(一到公園一定多), 就係做野既時候, 行左兩個圈, 體力其實都用左好多.

但今次既重重點其實係上山 (嚴格黎講係丘), 所以我地係小徑上長亨巴士總站補給過後, 就行青衣自然教育徑啦~

我地三人都好小心咁唔好影響到「當地生態」, 即唔好炸人地已有既Portal, 等人地有機會完成「Guardian」既成就, 我地亦都每人只佔其中一個而已, 留D空既Portal比其他有需要人士!

行完都已經天黑, 但我地仲係山, 當然呢條我覺得係LV1行山徑既自然徑, 就天黑都唔怕啦

仲可以睇到好靚既夜景

 番到落黎之後就係旁邊既巴士站搭E32過荃灣啦, 去荃灣既目的可大可小, 就係食M記啦, 唔醫飽個肚又點繼續行呢? 之後仲行埋個荃灣西公園.

一直行一路討論政治野, 要知道今日可是一個日子呢~屋企人都打比我, 覺得我會去, 哈哈, 最後我既諗法係, 「與其果D坐係屋企食花生, 指住電視批評學生, 不如行出街頭, 用身體了解件事」!

所以一行三人落佔中最原意之地 - 金鐘,  一路上聽到好多恐怖野, 例如警方開左槍,有人扮集會人士搗亂.

我地去到IFC出閘, 第一個感覺係, 好靜! 越行得近就越聞到胡椒味, 睇見好多學生運送物資去幫集會人士, 另一面見到香港大會堂外已有警察封路

為左可以更近咁去了解政府所講既「暴力」係點, 我地當時(2300)最可能既地方就係係解放軍營旁, 即大會堂後面既停車場上面睇, 當時係外圍在場既人都好激動, 我都受左少少感染, 好彩呀A定期拍一拍我示意冷靜.

約2330, 警方向集會入面放第一枝(我眼見的)催淚彈, 我可以話係好危險, 大部分學生都係干諾道中行車天橋上, 你一放彈, 其實有人跌落橋既機會都係有過蝸

之後馬上就向外圍放出第二彈, 群眾馬上向後退, 當然我地三個咩裝備都冇, 估唔到遠至行人天橋既彈連我地都會中, 好辛苦, 已經有左陰影, 但真係好想知道呢個「國際城市」既警方會點對學生, 因為佔領華爾街, 美國兩個月之後先清; 佔領立法院, 台北三個星期後, 有主席親身走入現場, 不怕欲罵, 先說服到. 今日只佔領中環數小時既香港, 幾個鐘頭就忍唔住要用武器. 「效率」多高啊!

到約定清場時間, 2014年9月29日0000, 外圍既人士開始向向海方向既警方防線(即停車場正下方)叫陣, 呢一刻我都覺得大家叫陣係有D過份, 但其實解決方法好簡單, 就係政府派人出黎商遵則可, 所謂既「門常開」就係講一套, 做一套.

未幾, 警方射出第三枚催淚彈, 位置同我冇20米之遠, 剛剛既陰影加上冇裝備加上氣氛緊張, 我係第一個轉身跑, 仲大叫「HI你, 走呀!」, 這一個畫面令我當晚澈夜難眠, 原來我係一個懦夫.

好辛苦, 眼水不停涌出黎, 鼻都快要呼吸唔到, 喉嚨痛得要死, 旁邊既人都馬上比水我

我了解到呢個情況下, 我同呀A帶住只係初中生既JESSE未必能安全咁目擊成件事情既經過, 我地決定離開了


當你見到催淚彈係你面前爆果陣, 你就會好好思考點解D人咁危險都仲要企出黎, 點解冇錢收都仲多人過政府活動. 有時間我不如溝女, 打機, 食野, 訓教, 點解仲要行出黎!

即使社會上有不同政見都好, 我認為"勇於追求自己堅信理念"已經比起果班紙上談兵既人更值得人尊重!

 伸延閱讀: 分享科技與遊戲 by HKGoldenMr.A - <Ingress 遊玩記錄 - 2014-09-28>
http://hkgoldenmra.blogspot.hk/2014/10/ingress-2014-09-28.html