早兩日有人上黎老人院SELL呢個產品，咁岩遇著我，我就講左幾句我既意見。
首先簡單講下呢個產品係咩：
用我既文字一句去講就係「一個特製貼合長期臥床人士的吸大小便、自動清洗下體和肛門及記錄排便數量的南韓製機器。」
之後要講呢個產品既好處：
1) 為本地老餅行業帶黎新科技
2) 可更環保地減少濕紙巾、紙尿片、膠手套及垃圾袋等
3) 提升服務人手名效率，減少人力需求
4) 提供即時及有記錄性的排污服務以大幅度改善老人家既水平
然後就到現階段我覺得呢個產品唔能夠快速打入市場既原因：
抗拒新科技
老一輩對新科技抗拒，因為佢驚自己處理唔到，要依賴其他人，同時自己唔想再去學新野。有一部分私營老人院先開始用電腦，所以大家可以想像情況係幾嚴重。
金錢負擔
收費為我認為最大既問題。首先現時一般社署最高批比綜援老人尿片費用每月唔超過三千蚊，但部機月租就三千幾蚊。而且如果係老人院用，入面既配件(如垃圾袋)及電費必定另外收費，即係每月有關收費定必貼近，甚至超過四千元。而最重要既係社署對新科技既反應一定好慢，即係呢個新科技未被列入佢地可實報實銷既清單當中的話，係一蚊都報銷唔到(以我所知)，咁對老人家同家屬既負擔就更重。相反，如果老人冇綜援會點？本身有錢都可以諗下，冇錢就雪上加霜。
老闆心態
「我請人番黎就要佢地做，唔通我比舊錢出黎請佢地係度輕鬆坐咩！？」類似既諗法都係香港普遍老闆既諗法，雖然我本身對呢個諗法有一定既意見，但係呢度先唔評論到底係岩定唔岩，因為佢係實實際際存在緊。如果有呢部機的話員工真係會做少好多野，起碼係體力上消耗少好多。不過以現時社署限定老人院人手時，不論佢地多野做與否，實際需要有多少人都好，老人院係有指定既最少人數係度。即係話，即使多左呢D機可能需要少D人手都好，你都係要請咁多人的話，就會番番段初果個老闆諗法：點解要請人番黎輕鬆做呢？
另外，果個人講左句唔知係咪我聽錯既說話：「只要租滿三年，部機就比用家長用架啦」。當時我理解係變相三年分期買機，所以之後唔洗錢，但有咩事都有人維修，不過用家死左或唔用，部機都係要還比果間公司。我當時答既係以我目測，係老人院長期臥床既係可以有十幾年既，但普遍平衡三至五年已經過世，咁樣呢個仲係咪一個賣點呢？
如果要廣泛打入市場，我認為最緊要都係價錢問題，如果可以好似尿片咁CLAIM得番(包括配件)的話先有機會，否則就只有非牟利機構、政府同有錢人先可以負擔得起。
P.S. 本人非常希望新科技能普及及打入私營老人院市場。
沒有留言:
張貼留言